Khaliif Ciise Mudan
Garoowe[RBC Radio] Wasiirka Amniga Dowladda Puntland Khaliif Ciise Mudan ayaa sheegay in Waxbarasho la’aanta haysata Carruurta reer Puntland ay ku keento iney ku biiraan Ururka Al-Shabaab.
Wasiirka amniga Puntland Khaliif Ciise Mudan oo khudbad ka Jeedinayey Furitaanka Ololaha Aada Dugsiyada ayaa ka dhawaajiyey in loo baahanyahay in Carruurta reer Puntland wax la baro si Mustaqbal wanaagsan u gaaraan.
Dhibaatooyinka ay Waxbarasho la’aantu u keento Carruurta reer Puntland ka sakow iney ku biiraan Al-Shabaab,waxaa kaloo taas u dheer iney kamid noqdaan buu yiri Wasiirku Kooxaha Burcadbadeed iyo kuwa dadka booba.
…”” Caruurteena waxay Iskuul la’aantu u geysaa dhibaatooyin farabdan sida iney ku biiraan Al-Shabaab, Burcadbadeeda, Qowleysatada,iney ku biiraan kuwa dadka ka furta alaabta Intaas oo dhan waxaa noo keenta Iskuul la’aanta Iyo Waxbarasho la’aanta….””ayuu yiri.
Mudane Khaliif Ciise Mudan ayaa tilmaamay iney garab taagan yihiin Carruurta reer Puntland isla markaana diyaar u yihiin Hirgelinta Barnaamijka Ololaha Aada Dugsiyada .
Wuxuu intaas ku daray in horumar kasta oo laga fulinaayo deegaanada Puntland ay ku xiran tahay suurtagalnimadeeda in amniga la sugo.
…”” Runtii waan garab taaganahay ,waxaana diyaar u nahay inaan ka qeybqaadano hirgelinta Barnaamijka aada Dugsiyada,waxaadna Ogaataan wax kasta oo wadanka la keeno in lagu hormariyo ineysan suurtagelin haddii amnigeeda la sugin….””ayuu yiri Khaliilf.
Wasiirka amniga Puntland Khaliif Ciise Mudan ayaa kula dardaarmay dhalinyarada reer Puntland iney ka faa’ideysaneysa Ololaha Aada Dugsiyada ee Puntland ka bilowday.
.…”” Dhalinyarada ka faa’ideysanaya Barnaamijka Aada Dugsiyada,waxaan kula dardaaramayaa iney iska ilaaliyaan iney soo dhexgalaan nimanka cadowga u ah Cilmiga,nimanka Cadowga u ah Jiritaanka Ummadeena,nimanka Cadowga u ah inaan Horumarno oo ah Al-Shabaab iyo wixii lamid ah inaanu ka digtoonaano…””ayuu yiri Khaliif.
Al-Shabaab!!
Mudane Khaliif Ciise Mudan ayaa Kooxda Al-Shabaab ku dhaliilay ineysan rabi Horumarka Waxbarashada reer Puntland isla markaana ay doonayaan Horumar sidii aan ku gaari lahayn balse taas aan isaga Caabin karno inagoo la dagaalana.
…””Nimanka All-Shabaab la yiraahdo ma rabaan Horumarka,ma rabaan Waxbarashada,ma rabaan inaan Horumarno,waxayna Isku dayayaan iney Is hortaagaan sidaan Horumar ku gaari lahayn,waxay rabaan iney ku dhex milmaan Shacabka lana dagaalano….””ayuu yiri.
Nabadgelyada!!
Gabagabadii Wasiirka Amniga Dowladda Puntland Khaliif Ciise Mudan ayuu sheegay in amniga ay ku naaloonayaan Shacabka Puntland ay Iska kaashadeen Shacabka iyo laamaha amniga.
…””Nabadgelyada aynu ku naalooneyno waxaynu ku gaarnay wadashaqeynta Shacabka iyo Ciidamada amniga runtii Ciidamada amniga oo dadaalay oo qabtay hawl badan laakiin mana shaqeyn kareen hadii Shacabku gacan siin,
Si kastaba Carruurta reer Puntland ayey Dowladu ku dadaaleysaa iney kaga leexiso falalka amnidarada ah ee ay ku kacaan,waxaana maanta daah-fur loogu sameeyey Olole waxtar u leh dhammaantood.
_________________________
Cismaan Turaabi
RBC Radio
Xafiiska Boosaaso
Use Facebook to Comment on this Post
