Muqdisho (RBC) Madaxweynaha dawlada federaalka Soomaaliya Xasan Sheekh Maxamuud ayaa goordhow cambaareeyay weeraradii qaraxyada ahaa ee maanta ka dhacay magaalada Muqdisho.
Madaxweynaha oo hadal ka jeedinayey kulankii “Dhibaatada Xagjirnimada” ee saaka ka furmay magaalada Muqdisho ayaa si kulul u cambaareeyay weerarada qaraxyada ah ee maanta ka dhacay agagaarka maqaayada the Village ee magaalada Muqdisho.
Madaxweynaha ayaa ku eedeeyay weeraradan Al Shabaab, wuxuuna sheegay in dawlada aysan ka cajisi doonin sugida amaanka guud ahaan dalka, isagoo sheegay in ujeedada kooxda Al Shabaab ay mar walba tahay cabnsi gelinta iyo dhibaateynta ummada Soomaaliyeed.
Inkastoo kooxda Al Shabaa weli uusan jirin war ka soo baxay oo ay ku sheegteen labada qarax ee ka dhacday agagaarka maqaayada The Village ayaa haddana waxaa horey weerarada ka dhaca caasimada u fulin jiray Al Shabaab.
Weeraradan labada ah ayaa illaa hadda inta la og yahay waxaa ku dhintay dad kor u dhaafaya 10 ruux oo rayid ah iyo dhaawac gaaraya siddeed ruux.
Labada qarax ayaa sida dad goobjoogayaal ah sheegeen waxaa midka hore loo adeegsaday baabuur miinooyin laga soo buuxiyey oo la dhigay goob baabuurta la dhigto oo ku taalla bannaanka maqaayada The Village, halkaasoo markii hore illaa shan ruux ay ku dhinteen, isla daqiiqado ka dib ayaa nin waxyaabaha qarxa soo xirtay isku dhex qarxiyey dadkii goobta usoo gurmaday taasoo sare u qaaday khasaaraha dhimashada, dhaawaca iyo burburka soo gaaray guryaha iyo baabuurta goobtaasi taallay.
RBC Radio
Use Facebook to Comment on this Post
