Boosaaso[RBC Radio] Musharax Cali Cabdi Awaare ayaa maanta gaaray magaaladda Boosaaso ee xarunta Ganacsiga Puntland ee Boosaaso,waxaana laga dareemay soo dhaweynta Musharaxa guud ahaan gobolka Bari iyo deegaanada Puntland.
Musharaxa inta uusan soo gelin Boosaaso,waxaa afaafka Kantaroolka laga soo galo magaaladda kaga hortagay Boqolaal dadweyne ah oo watey Sawirka Musharaxa,Calanka Puntlad,Siyaasiyiin,Aqoonyahan iyo dad kale.
Musharax Cali Cabdi Awaare ayaa loo soo gelibiyey Gurigiisa,halkaasna wuxuu kula hadlay Saxaafada iyo dadweynihii tirade badnaa ee soo dhaweynta u sameeyey Musharaxa.
Cali Cabdi Awaare ayaa Saxaafadda u sheegay in uu u mahadcelinaayo Bulshada qeybaheeda kala duwan ee soo dhaweynta u sameeyey,wuxuuna tilmaamay in Shacabka ku dhaqan gobolka Bari uu ka doonayo iney Taageeraan.
Wuxuu tilmaamay ineysan shaki kaga jirin in uu ku guuleysanayo Doorashada 8-da Janaury 2014 ee Puntland ka qabsoomi doonta isla markaana uu ballanqaadayo in uu ballaarin doono Dekeda,Garoonka Diyaaradaha Boosaaso.
Mudane Awaare ayaa sheegay in uu wax badan ka qaban doono haddii Puntland uu Madaxweyne uu ka noqdo dhanka Amaanka,Caafimaadka,Waxbarashada isla markaana uu laba Jibaari doono Mushaaraadka ay qaataan Ciidamada amniga Puntland.
Musharax Cali Cabdi Awaare ayaa carabaabay in Musharaxiinta la tartameysa uu kaga duwan yahay Waxqabadii mudadii uu Xilalka kasoo qabtay Puntland taasina ay tahay mid Ummada reer Puntland ay kawada dharagsanyihiin.
Musharax Cali oo ah rug cadaa Siyaasi ah isla markaana Waxqabad la taaban karo kasoo qabtay Puntland ayaa noqonay Musharaxii ugu horeeyey ee Ololihiisa Doorashada ka bilaaba Puntland,waxaana si weyn looga soo dhaweeyey deegaano kamid ah Puntland.
Waxaa la filayaa in mudada uu joogo magaaladda Boosaaso ee xarunta ganacsiga Puntland uu Musharax Cali Cabdi Awaare uu kulamo la qaadan doono Bulshada qeybaheeda kala duwan eek u dhaqan gobolka.
Musharax Awaare ayaa ah Mulkiilaha Hay’ada Warbaahinta Soomaaliyeed ee SBC,waana Idaacadii ugu horeysay ee laga furo Puntland taasoo ay kasoo baxeen Wariyaasha ugu badan ee ka hawlgala qeybaha kala duwan ee Warbaahinta Puntland.
_______________
Cismaan Turaabi
RBC Radio
Xafiiska Boosaaso
Use Facebook to Comment on this Post
