Muqdisho (RBC) Taliyaha Nabadsugida gobolka Banaadir Col. Khaliif Axmed Ereg oo maanta ku dhaawacmay qaraxii ismiidaaminta ee lagula beegsaday agagaarka guriga Fiyoorayaasha ee magaalada Muqdisho ayaa goordhow ka hadlay warbaahinta gudaha iyadoo muuqaal video ah oo laga soo duubay loo qeybiyey warbaahinta gudaha ee Muqdisho.
Col. Khaliif Ereg ayaa isagoo taagan muuqaalka ka soo muuqday waxaana daankiisa iyo qoortiisa xagga dambe ka muuqday dhaawac ka soo gaaray qaraxii maanta.
Taliyaha oo filimkan looga soo duubay goobta lagu daweynayo ayaa ugu horreyn sheegay in xaaladiisa ay aad u fiican tahay uuna caafimaad qabo marka laga reebo dhaawacyo kooban oo ka soo gaaray firirkii ka dhashay qaraxii lala beegsaday baabuurkii uu saarnaa maanta kaasoo myraayadihiisa burburay ay u geysteen dhaawacyo jirkiisa.
Wuxuu sheegay in xilli uu baabuurkiisa saarnaa uuna marayey wadada hormarta Tiyaatarka Qaranka uu soo weeraray baabuur noociisu ahaa TOYOTA SURF kaasoo ay saarnaayeen labo nin oo ismiidaaminta fuliyey, wuxuuna taliyuhu intaas ku daray in qarax ku xirnaa baabuurka ay la damacsanaayeen baabuurkiisa balse aysan la helin oo ay ku dheceen baabuur dad rakaab ah ay saarnaayeen oo jidka marayey.
“Waa Illaah mahadiis wax weyn nama gaarin.” ayuu yiri Col Ereg oo kuleetiga shaarkiisu ka muuqday dhiig.
Dagaalka waan sii wadeynaa
Col. Khaliif Axmed Ereg oo aan wax su’aalo ah la weydiin maadaama muuqaalkan ay ka duubeen warbaahinta dawlada ayaa ku hanjabay inay sii wadi doonaan dagaalka ay kula jiraan kooxda Al Shabaab.
“Waan sii wadeynaa shaqada aan wadno illaa aanka soo qaqabano” ayuu yiri.
Warar ku dhow saraakiisha amaanka ayaa sheegaya in Col. Khaliif Ereg xaaladiisa ay ka soo reyneyso dibna looga saaray isbitaalka hadda.
Kooxda Al Shabaab oo sheegatay masuuliyadda weerarka maanta ayaa sheegtay in bartilmaameedku uu ahaa Col. Khaliif Axmed Ereg oo masuul ka ah ciidamada nabadsugida ee gobolka Banaadir, kana mid ah saraakiisha ugu muhimsan dhanka amaanka Muqdisho.
RBC Radio
Use Facebook to Comment on this Post
