Addis Ababa (RBC) Madaxweynaha dawlada federaalka Soomaaliya Xasan Sheekh Maxamuud ayaa goordhow khudbad ka jeediyey munaasabad lagu xusayo geeridii raysul wasaarihii hore ee dalka Ethiopia Meles Zenawi oo maanta lagu qabtay magaalada Addis Ababa ee xarunta wadanka Ethiopia.
Madaxweynaha Soomaaliya oo khudbad dheer ka jeediyey goobta oo ay ku sugnaayeen madax ka kala timid caalamka iyo qaaradda Afrika ayaa si weyn u amaanay kaalinta dawlada Ethiopia ee ku aadan caawinta dawlada federaalka ee Soomaaliya.
“Ethiopia waxay mar walba garab taagneyd dawlada federaalka Soomaaliya, waxana si gaar ah ugu mahadcelinayaa raysul wasaaraha saaxiibkey ee Hailemariam.” ayuu yiri Xasan Sheekh oo af Ingiriisi ku hadlayey.
Xasan Sheekh Maxamuud wuxuu tilmaamay in kaalinta Ethiopia ee ku wajahan Soomaaliya ay ahayd mid muhiim ah isagoo soo qaaday ciidamada Ethiopia ee gacanta ku siiyey dawlada Soomaaliya dib u qabsashada gobolo ka mid ah dalka.
Mar uu ka hadlay xiriirka labada dal, wuxuu madaxweyne Xasan Sheekh Maxamuud tibaaxay in xiriirka labada dawladood uu aadu sarreeyo uuna kaalin weyn arrintaasi ka qaatay raysul wasaarihii geeriyooday ee Meles Zenawi kaasoo uu sheegay inuu garab istaagay dawladihii ku-meelgaarka ahaa ee Soomaaliya soo maray.
Madaxweynaha Soomaaliya ayaa dawlada Ethiopia ka codsaday qalabaynta ciidamada qalabka sida ee dawlada Soomaaliya, isagoo sheegay in amaanka iyo xasiloonida Soomaaliya iyo inay ka guuleysato kooxaha argagixisada ay ku xiran tahay dhismaha ciidamada qalabka sida ee dalka.
Baaqaa codsiga ee madaxweyne Xasan Sheekh ayaa yimid iyadoo hal usbuuc laga joogo markii diyaarad militari ee hub iyo saanad oo u socday dawlada federaalka Soomaaliya lagana keenay dalka Ethiopia ay ku burburtay garoonka diyaaradaha ee Magaalada Muqdisho ee Aden Cabdulle taasoo labada dawladood illaa hadda aysan ka faaloonin.
RBC Radio
Use Facebook to Comment on this Post
