Muqdisho{RBC Radio} Dab ayaa goordhaweyd ka kacay Goob Shidaalka lagu eebiyo oo ku taalla magaalada Muqdisho ee caasimadda Soomaaliya,goobta uu dabku ka kacay ayaa ku taalla inta u dhaxaysa Sarta Daalo iyo Isgoyska Baar Ubax magaalada Muqdisho.
Dadka ayaa la sheegay inuu goobtaasi qabsaday kadib markii sida la sheegay uu goobta Shidaalka lagu iibinayey uu Sigaar daaran ku tuuray nin madaxa looga jiray,Ninka ayaa la tilmaamay inuu Sigaar ku cabayey agaagka hore ee dhismaha uu dabku qabsaday,dad goobta ku sugnaa ayaa la tilmaamay iney ninka xanuunsan u sheegeen inuu goobtaas kala fogaado sigaarka balse ninka ayaa Sigaarkii ii shidan ku tuuray goobtii shidaalku yaalla taasoo dhalisay inuu dab qabsado goobtaas.
Lama soo sheegin khasaaro nafeed oo ka dhashay dabka,balse waxaa dabka ku basbeelay Foostooyin iyo Caagag uu shidaal ku jiray,kuwaas oo qaraxyo Sameeyey,waxaana sidoo kale burbur uu soo gaaray guriga ay ku taalla goobta ganacsiga oo lasoo sheegayo inuu qayb ahaan dumay.
Dab damis ay leedaha Shirkadda Isgaarsiinta Hormuud telecom ayaa durbadiiba goobta soo gaaray,waxaana sidoo kale goobta gaaray Dabdamisyo ay leedahay dowladda federaalka iyo ciidamo boolis ah,daminta dabka ayaa markii danbe lagu guuleystay.
Ma cadda inta uu gaarsiisan yahay khasaaraha hantiyeed ee ka dhashay dabka Saaka ka kacay xarunta ganacsi ee lagu iibiyo Shidaalka.
RBC Radio
Xafiiska Muqdisho
Use Facebook to Comment on this Post
