Muqdisho(RBC Radio) R/wasaaraha xukuumada Soomaaliya Cabdi Faarax Shiirdoon Saacid ayaa maanta xafiiskiisa Muqdisho ku qaabilay gudi xaqiiqo raadin ah oo ka socda wadamada urur goboleedka IGAD,kulanka uu r/wasaare Saacid la qaatay gudiga ka socda urur goboleedka IGAD ee loo xilsaaray iney soo qiimeeyaan xaaladaha dalka Soomaaliya ayaa waxaa ku wehlinayey qaar ka tirsan golihiisa wasiirada.
Markii soo soo dhammaaday kulanka uu R/wasaaruhu la qaatay gudiga IGAD ayaa waxaa warbaahinta la hadlay wasiirka warfaafinta xukuumadda Soomaaliya C/llaahi Ciil-mooge Xirsi oo ka warbixiyey waxyaabihii ay gudigani kala hadleen R/wasaaraha Soomaaliya Cabdi faarax Shiirdoon.
C/llaahi Ciil-mooge Xire ayaa sheegay in waftigani ay yihiin gudi xaqiiqo raadin ah oo lagu soo magacaabay shirkii ugu danbeeyey ee 3-dii bishan magaalada Addis ababa ay ku yeesheen madaxweynayaasha urur goboleedka IGAD,wuxuuna tilmaamay in loosoo wakiishay qiimeynta xaaladaha guud ee dalka Soomaaliya.
Wuxuuna sheegay in gudigani ay Muqdisho ku sugnaayeen 2-dii maalmood ee ina dhaafay maantane ay soo gabagabeeyeen socdaalkii ay Muqdisho ku joogeen,wuxuuna intaa ku daray in gudigan qiimeynaya xaaladaha dalku ay la kulmayaan qaybaha kala duwan ee bulshada si ay u aruuriyaan xogta ku saabsan xaaladaha kala duwan ee dalka.
C/llaahi Ciil-mooge ayaa sheegay iney xukuumadu u gudbisay mowqifkeeda ku aaddan xaaladaha dalka,wuxuuna sidoo kale sheegay iney ka wada hadleen sida loo wajahayo degenaanshaha dalka Soomaaliya iyo la dagaalanka waxa uu ugu yeeray argagixisada,wuxuuna intaa raaciyey iney isla soo qaadeen arimaha Jubooyinka balse waxa uu tilmaamay in arimaha Kismaayo ay tahay mid wali qabyo ah gudigune uu gaari doono gudaha Kismaayo isla markaane ay u kuurgali doonaan xaaladaha dhabta ah ee ka jira kadibne ay warbixinta hor geyn doonaan shirarka aan caadiga ahayn ee IGAD.
RBC Radio
Xafiiska Wararka Muqdisho
Use Facebook to Comment on this Post
