Muqdisho((RBC Radio) Madaxweynaha dowlada federaalka Soomaaliya Xasan Sheekh Maxamuud ayaa galabta ka ambabaxay magaalada Muqdisho ee caasimada Soomaaliya,madaxweynaha iyo waftigiisa ayaa u kicitimay magaalada Addis ababa ee caasimada wadanka Ethiopia halkaas oo ay kaga qayb galayaan shir madaxeedka wadamada ku jira urur goboleedka IGAD.
Afhayeenka madaxweynaha dowlada Federaalka Soomaaliya Injineer C/raxmaan Yariisow oo warbaahinta kula hadlay garoonka diyaaradaha magaalada Muqdisho inta aysan waftiga madaxweynuhu ka ambabixin Muqdisho ayaa sheegay in madaxweyne Xasan Sheekh uu ka qaybgalayo shir madaxeedka IGAD ee ka furmaya magaalada Addis ababa.
Injineer Yariisow ayaa sheegay in madaxweynaha dowlada Federaalka Soomaaliya Xasan Sheekh Maxamuud uu shirkaasi ka jeedin doono khudbad dheer oo dhinacyo badan taabaneysa,wuxuuna si gaar ah u xusay in madaxweynuhu uu ka hadli doono Ajandayaasha shirka 7-da bishan May ka furmaya magaalada London ee dalka Ingiriiska iyo xaaladaha guud ee dalka Soomaaliya ka jira xiligan.
Afhayeenka madaxweynaha ayaa intaa ku daray in magaalada Addis ababa ay maanta ku kulmeen wasiirada arimaha dibada dalalka Urur goboleedka IGAD,wuxuuna tilmaamay iney Soomaaliya uga qaybgashay wasiirka arimaha dibada iyo iskaashiga caalamiga ahna R/wasaare ku xigeenka dalka Marwo Fowziya Yuusuf Xaaji Aadan.
Madaxweynaha ayaa dadaal ugu jiray u diyaar garowga shirka ka furmaya magaalada London ee caasimada wadanka UK,wuxuuna safaro ku tagay wadamada gobolka si uu madaxda dalalka u hordhigo shirka London isla markaane uu casuumaad rasmi ah ugu fidin lahaa madaxda wadamadaas si ay uga qayb galaan shirka 7-da bishan May ka furmaya London kaasoo taageero loogu raadinayo dowlada cusub ee Federaalka ah.
RBC Radio
Xafiiska Wararka Muqdisho
Use Facebook to Comment on this Post
