Washington(RBC):- Madaxweynaha Somaliland Axmed Maxamed Maxamuud (Siilaanyo) oo isaga iyo Wefti uu hoggaaminayaa maalmihii u dambeeyey socdaal shaqo ku joogeen magaalada Washington ee waddanka Maraykanka, ayaa maanta kulan la yeeshay Guddiga arrimaha Afrika u qaabbilsan Maraykanka.
Madaxweyne Axmed Maxamed Maxamuud (Siilaanyo) oo ku gudo jira socdaalka shaqo ee uu ku marayo dalka Maraykanka, ayaa maanta aqalka Baarlamaanka ee Capitol Hill kula kulmay Senator Jeff Flake oo ka tirsan Gudida arrimaha Afrika u qaabbilsan aqalka Odayaasha ee dalka Maraykanka.
Madaxweynaha Somaliland ayaa Senator Jeff Flake uga waRramay xaalaDda guud ee Somaliland iyo marxaladihii kala duwanaa ee ay soo martay, waxaanu u soo jeediyay inay Maraykanku Somaliland wax kala qabtaan horumarka dhaqaalaha, siyaasadda iyo qaddiyadda madax-bannaanida.
Senator Jeff Flake waxa Madaxweynaha uga mahad-celiyay booqashada uu ku jooga Maraykanka, waxa uu Somaliland ku bogaadiyay horumarka iyo degganaanshaha ay hirgelisay 22-kii sannadood ee la soo dhaafay.
Senator-ku waxa uu Madaxweyne Axmed-Siilaanyo u soo jeediyay inay guntiga dhiisha iskaga dhigaan sidii loo sii xoojin lahaa horumarka iyo xasilloonida Somaliland ka tisqaaday oo saamayn togan ku leh mandaqada geeska Afrika. Senator-ku waxa uu beesha caalamka ugu baaqay inay gacan weyn siiyaan Somaliland si hore loogu sii mariyo dimuqraadiyada iyo dawladnimada Somaliland.
Madaxweynaha Somaliland Axmed-Siilaanyo waxaa kulankaas ku weheliyey Wakiilka Somaliland u fadhiya Maraykanka, Wasiirrada Wasaaradaha Arrimaha Dibedda, Macdanta, Biyaha iyo Tamarta, Qorshaynta, Madaxtooyada, Wasiiru-dawlaha Maaliyadda iyo Marwada Madaxweynaha oo xubnaha Weftigiisa ka tirsanaa.
RBC Radio
Xafiiska wararka ee Hargeysa.
Use Facebook to Comment on this Post
