Muqdisho(RBC Radio) Wasiirka arimaha gudaha iyo amniga qaranka xukuumada Soomaaliya C/kariin Xuseen Guuleed ayaa maanta hortagay mudanayaasha baarlamaanka oo su’aalo weydiiyey xildhibaanada baarlamaanka ayaa hore u dalbaday in wasiirku uu yimaado xarunta golaha shacabka si ay su’aalo la xiriira amniga dalka u weydiiyaan.
Su’aalihii wasiirka wax laga weydiiyey ayaa waxaa kamid ahaa sida ay ku dhacday in maxaabiis ku jirtay gacanta dowlada meydkooda lagu arko wadooyinka magaalada Muqdisho,wuxuuna kaga jawaabay in raggaasi ay ahaayeen 2 ruux oo ka tirsanaa alshabaab oo ay soo qabteen cidamada nabadsugida,wuxuuna tilmaamay in ragga ka tirsanaa alshabaab ay saraakiisha nabadsugida u sheegeen iney hayaan macluumaad ku aaddan halka ay ku sugan yihiin rag alshabaab ka tirsan iyo hub fara badan oo ay isticmaalaa.
Intaas kadib ayuu sheegay in 2-dii nin ee ka tirsanaa alshabaab ay raacaan ciidan ka tirsan nabadsugida dowlada Soomaaliya si ay gacanta ugu soo dhigaan hubka iyo ragga alshabaab katirsan ee ay sheegeen iney og yihiin halka ay joogaan, wasiirka ayaa sheegay in raggaasi ay shirqooleen ciidankii nabadsugida kadibne ay bilaabatay is rasaaseyn dhexmartay labada dhinac Markii ay rasaasta isweydaarsadeene ay tacshiiradaas ku naf waayeen 2-dii nin ee ka tirsanaa alshabaab ee meydkooda lagu arkay wadooyinka Muqdisho.
Wasiirka arimaha gudaha ayaa wax laga weydiiyey shirkadaha Ajaanibta ah ee dalka ka hawlgala waxa ay wasaaradiisu kala socoto,wuxuuna tilmaamay in dowlada Soomaaliya ay u diiwaan gashan tahay 1 hay’ada,wuxuuna qiray iney jiraan hay’ado badan oo ajaanib ah oo ka hawlgala gudaha garoonka Muqdisho iyo xerada Xalane isla markaane ay adeegyo dhanka amniga ah siiyaan ciidamada AMISOM ee dalka Jooga.
C/kariin Xuseen Guuleed ayaa sheegay in xukuumadu ay ku dadaaleyso sidii ay dhammaan u diiwaan galin lahayd shirkadaha Ajinabiga ah ee dalka ku sugan isla markaane ay uga war hayn lahayd hawlaha ay dalka ka qabtaan.
RBC Radio
Xafiiska Wararka Muqdisho
Use Facebook to Comment on this Post
