Muqdisho (RBC Radio) Xaruntii ugu weyneyd ee warshada Isbuunyada Mubaarak ay ku lahayd magaalada Muqdisho ayaa gabi ahaanba ku basbeeshay dab aad u xoogganaa oo xalay ka kacay.
Xarunta ugu weyn ee Warshada oo ku taalla Ex-control Balcad ee degmada Hiliwaa ayaa waxaa ka kacay dab baaxad weyn kaasoo guud ahaanba baabi’iyey dhismihii xarunta iyo agabkii yaallay intaba.
Dabka oo ka bilowday xarunta warshadda abaare 12:00 Habeenimo ee xalay saqdii dhexe ayaa waxa uu baabi’iyey dhammaan agabkii ay warshadu ku shaqaynaysay sida Matooradii,MishiinadaKiimikadii ay ku samayn jirtay Joodariyada iyo Fadhi carbeedyada .
Mahad C/qaadir oo ka tirsan masuuliyiinta warshada Isbuunyada Mubaarak oo warbaahinta la hadlay ayaa sheegay in dabka ka kacay xarunta warshadooda uusan geysan khasaare nafeed oo soo gaaray shaqaalahooda balse wuxuu tilmaamay iney dabkaas ku waayeen hanti fara badan.
Mahad ayaa intaa ku daray in dabkani uu ahaa musiibo Rabbaani ah oo aysan wali garaneen waxa sababay balse ay dib ka faah faahin doonaan,,mar la weydiiyey inta uu la egtahay hantida ku basbeeshay dabka ayuu tibaaxay iney dib kasoo gudbin doonaan.
Daminta dabka oo socotay in kabadn 6 saac oo xiriir ah ayaa waxaa lagu guuleystay saaka Salaadii Subax,waxaana gabi ahaanba baaba’ay dhismihii xarunta iyo wixii ku jiray,Mahad ayaa tibaaxay in masuuliyiinta Warshadu ay ku rajo weyn yihiin iney kasoo kaban doonaan Musiibada ku habsatay isla markaane ay sii wadi doonaan adeegyada ay u hayeen shacabka Soomaaliyeed.
RBC Radio
Xafiiska Wararka Muqdisho
Use Facebook to Comment on this Post
