Muqdisho(RBC Radio) Diyaarad gaar ah oo siday meydka Alla ha u naxariistee Marxuum Maxamuud Ismaaciil Barkhadle oo ahaa wasiiru dowlihii wasaarada Adeega Bulshada xukuumada Soomaaliya ayaa maanta duhurnimadii soo caga dhigatay garoonka diyaaradaha magaalada Muqdisho markii maydka lasoo gaarsiiyey Magaalada Muqdisho ayaa waxaa lagula tukaday salaada Janaasada gudaha garoonka Muqdisho.
Markii lagu tukaday Salaadii Janaasada ayaa waxaa loo qaaday meydka Marxuum Maxamuud Ismaaciil Barkhadle cisbitaalka weyn ee Madiina halkaas oo loogu sameeyey aas qaran oo ay ka qayb galeen masuuliyiin fara badan oo ka tirsan xukuumada iyo baarlamaanka Soomaaliya.
Masuuliyiinta aaska marxuumka ka qayb galay ayaa waxaa ka mid ahaa wasiirada adeega bulshada xukuumada Soomaaliya, Wasiirka Khayraadka Dalka, Gudoomiye ku xigeenka koowaad ee baarlamaanka Soomaaliya iyo masuuliyiin kale oo ka tirsan xukuumadda Soomaaliya.
Marxuum Maxamuud Ismaaciil Barkhadle ayaa habeen hore ku geeriyooday magaalo xeebeedka Mombasa ee wadanka Kenya halkaas oo la sheegay inuu u joogay hawlo shaqo waxaana la tilmaamay in wasiirku uu u geeriyooday alla ha u naxariistee xanuun dhanka wadnaha kaga soo booday.
Taariikh kooban
Marxuum Maxamuud Ismaaciil Barkhadle. Sawirkan waxaa laga qaaday galabnimadii Khamiistii 21 Mar 2013, waxyar ka dib markii uu ka qeybgalay kulankii golaha wasiirada dawlada federaalka Somalia.
Allah ha u naxariistee Marxuum Maxamuud Ismaaciil waxaa uu ku dhashay magaalada Boorama, iyadoo waxbarashadiisa hoose iyo dhexana ku soo qaatay magaalada Hargeysa.
Mudadii burburka dalka wuxuu u guuray wadanka Australia oo haatanba xaaskiisa iyo carruurtiisa waaweyn ay ku nool yihiin.
Marxuumka ayaa caan ku ahaa ganacsiga ka hor intii uusan gelin siyaasadda. Wuxuuna hawlo ganacsi oo u badan shirkado ku lahaa wadamada Bariga fog gaar ahaan Thailand iyo Indonesia.
Marxuum Maxamuud Ismaaciil Barkhadle. Sawirkan waxaa laga qaaday galabnimadii Khamiistii 21 Mar 2013, waxyar ka dib markii uu ka qeybgalay kulankii golaha wasiirada dawlada federaalka Somalia.
Marxuumka ayaa markii ugu horreysay ka mid noqday golaha wasiirada ee xukuumadda raysul wasaare Saacid sanadkii hore markii shaaca laga qaaday liiska wasiir ku xigeenada iyo wasiiru dawlayaasha.
RBC Radio
Xafiiska Wararka Muqdisho
Use Facebook to Comment on this Post
