Muqdisho(RBC Radio) War hadda naga soo gaaray xarunta Golaha shacabka ee ay ka socotay codaynta loo qaadayay mooshinka laga keenay R/wasaaraha xukuumadda federaalka Soomaaliya Mudane Cabdi Faarax Shiirdoon Saacid ayaa sheegaya in Xildhibaanada Soomaaliya ay meel mariyeen mooshinka ka dhanka ahaa R/wasaare Saacid.
Gudoonka Baarlamaanka federaalka Soomaaliya ayaa ku dhawaaqay natiijada kasoo baxday codaynta Xildhibaanada Baarlamaanka Soomaaliya, wuxuuna sheegay inay mooshinka laga keenay R/wasaare Saacid ay u codeeyeen 184 Xildhibaan, ayna kasoo horjeesadeen 65 Xildhibaan, wuxuuna gudoonku sheegay inuu si aqlabiyad leh u meel maray mooshinka laga soo gudbiyay xukuumadda R/wasaare Saacid.
Gudoomiyaha Baarlamaanka Soomaaliya Mudane Maxamed Sheekh Cismaan Jawaari ayaa daqiiqado ka dib la filayaa inuu xarunta Golaha shacabka ku qabto shir jaraa’id oo uu uga hadlayo sida ay u dhacday codaynta mooshinka laga keenay R/wasaare Saacid, iyo soo magacaabista R/wasaaraha cusub.
Waxaa mudooyinkii lasoo dhaafay soo jiitamayay khilaaf xoogan oo ka dhexeeya madaxweyne Xasan Sheekh Maxamuud iyo R/wasaarihiisa, khilaafka ayaa markii dambe u biyo shubtay in loo gudbiyo Baarlamaanka Soomaaliya si ay go’aan uga gaaraan khilaafkaas, Xildhibaanada Baarlamaanka ayaa daqiiqado ka hor go’aamiyay in kalsoonida lagala noqdo xukuumadda R/wasaare Saacid.
RBC Radio
Xafiiska Muqdisho
Use Facebook to Comment on this Post
