Nairobi(RBC Radio) Ganacsatada Soomaaliyeed ee ku dhaqan magaalada Nairobi ee caasimadda dalka Kenya ayaa sheegay ineysan wax cabsi ah ka qabin in weerarkii Al-shabaab ay ka geysteen Suuqa Ganacsiga ee Westgate uu wax saamayn ah ku yeesho Soomaalida ku nool dalka Kenya.
Maxamed Maxamuud Guutaale oo ah xog-hayaha ganacsatada Soomaaliyeed ee dalka Kenya ayaa sheegay in dadka Soomaaliyeed ee ku dhaqan Kenya ineysan baqdin ka qabin in loo bartilmaameedsado weerarkii uu dhiigga badani ku daatay ee ka dhacay Westgate Mall.
Wuxuuna xusay in bulshada Soomaaliyeed ay la mid yihiin dadka kale ee reer kenya,wuxuuna tibaaxay iney warbaahinta si weyn uga muujiyeen sida ay dadka Soomaaliyeed uga xun yihiin dhibaatadaas iyo sida ay ula xanuunsanayaan dadka reer Kenya una garab taagan yihiin.
Guutaale ayaa sheegay iney dowladda kenya ka haystaan ballan qaaday ku aaddan inaan Soomaalida loo bartilmaameedsan weerarkaas,wuxuuna hoosta ka xariiqay in hadii baaritaano ama hawlgal la doonayo in laga sameeyo xaafadda Soomaalida ee Islii iney doonayaan in loola yimaado ogolaanshaha dowladda Kenya.
Wuxuuna meesha ka saaray insidii dhici jirtay ay ciidamada dalkaas iska soo galaan xaafadaha Soomaalida kadibne ay dhibaato kula dhaqaaqaan bulshada Soomaaliyeed ee ku dhaqan magaalada Nairobi ee caasimadda Kenya gaar ahaan xaafadda Islii.
Xog-hayaha ganacsatada Soomaaliyee ee Kenya ayaa xusay inuu dhammaaday waqtigii dadka Soomaaliyeed la takoori jiray,wuxuuna ugu laab qaboojiyey dadka Soomaaliyeed inaan wax dhibaato ah loo geysan doonin.
RBC Radio
Use Facebook to Comment on this Post
