Faroole waa Halyeey aan la Holin karin
Shiine Culay.
Shiine.culay@gmail.com
Agoosto 05 2013
Shiine Culay waxa uu kamid yahay Falanqeeyeyaasha Idman ee Raxanreeb.com Hadii aad dooneyso in aad ka mid noqotid Falanqeeyayaasha Idman ee Raxanreeb.com waxaad nagala soo xiriiri kartaa Raxanreeb@Gmail.com
Falanqeeye Idman Shiine Culay.
Waxaan dhegaystay khudbad uu Madaxweyne Cabdiraxmaan Sh. Maxamed Maxamuud (Faroole) ka jeediyey xuska sanad guuradii 15-aad ee ka soo wareegtay markii dhidibada loo taagay Maamulka Puntland khudbadaas oo si weyn isoo jiidatay iguna kaliftay in aan xoogaa ka falanqeeyo.
Madaxweynaha khudbadiisa oo qaadatay ku dhowaad 1 saac wuxuu kaga hadlay arrimo badan oo la xiriiray Waxqabadkii Xukuumadiisa, Caqabadihii soo wajahay, Geedi socodka Dimuqraadiyada, Rabshadihii qardho oo uu ku eedeeyey Gen. Cade & Sida Dowlada Federaalku u gees martay Dastuurkii Soomaali ku heshiisay.
Waxqabadkii Xukuumadiisa.
Waxaan Madaxweynaha ugu marag furayaa in Xukuumadiisu qabatay waxqabad la taaban karo sida Horumarinta Adeegyada Bulshada, Samaynta Miisaaniyad fadhida, U bixinta Mushaharka & Adeegyada Dowlada si joogta ah, Dhismaha Ciidamo xoog leh, La dagaalanka Burcad badeeda & musuq maasuqa, Horumarinta Siyaasada Arrimaha Dibada, Geedi socodka Nidaamka Dimuqraadiyada & In Puntland kaalin wax ku ool ah ka ciyaarto dhismaha Dowlad Federaal oo rasmi ah.
Caqabadaha Soo wajahay.
Madaxweynuhu wuxuu dhaxlay Dowlad magac ahaan u jirta balse Hay’adaheedii Dowladu yihiin kuwo si weyn u kala daadsan, Maamul leh cadowyo badan hadana aan lahayn Ciidamo habaysan, Khasnadihii Lacagta oo haawanaya & Daymo badan oo Dowlada lagu leeyahay, Caasimadii Gobolka Sool oo Puntland laga faro maroorsaday, Dagaal beeleedyo meelaha qaar ka jiray & Is bedel ku dhacay hogaankii TFG taas oo sababtay inuu xumaado xiriirkii labada dhinac.
Iyadoo ay jireen caqabadaha intaa le’eg awooda Dowladuna ahayd mid kooban laysma dhigan ee waxaa lagu dadaalay sidii looga gudbi lahaa caqabad kasta taas oo dadaal & dhabar adayg badan kadib suurtagelisay in si orad ah lagu jiiro wadiiqo ay ka buuxeen doqxaan aan kabo loo sidan.
Geedi socodka Dimuqraadiyada.
Xukuumad kasta oo talada Puntland soo qabata waxaa ugu waa weynaa qorshayaasheeda sidii ay Dalka u gaarsiin lahayd hanaanka asxaabta badan oo Dadweynahu u qabeen hamuun badan lana aaminsanaa hadii uu hirgalo in Dalka ay ka dhacayso doorashooyin xor ah oo muwaadin kasta xaq u siinaysa inuu wax doorto ama la soo doorto sidaana looga gudbo hanaanka beelaha oo hogaankii ugu sareeyey Dalka ka dhigay mid si meerto ah beelaha qaar ugu xisaabtamaan laakiin isku day walba oo la sameeyey ma noqon mid lagu guulaysto.
Xukuumada Madaxweyne Faroole waxay geed dheer & mid gaaban u fuushay sidii ay hanaankaas dalka ugu soo dabaali lahayd iyadoo ku bixisay Wakhti, Dadaal & Dhaqaaleba.
Nasiib wanaag waxaa lagu guulaystay in la sameeyo Dastuur rasmi ah oo bedela axdigii horay Dalka ugu yaalay, Dhismaha Gudi doorasho, furitaanka asxaabtii siyaasada & diiwaan gelintooda, Wacyi gelinta bulshada si ay u noqdaan kuwo u diyaarsan hanaanka asxaabta badan & Samaynta Ro’ad map qeexayey sida loo hirgelinayo nidaamkaas.
Nasiib daro kooxo leh ujeedooyin kala duwan oo qaarkood u adeegayeen dano shisheeye kana midaysnaa sidii loo xagal daacin lahaa geedi socodka Dimuqraadiyada waxay wadeen dhankooda olole ay kaga soo horjeedeen hanaankaas ilaa ay dagaal hubaysan oo dhiig ku daatay kala hor yimaadeen hawl wadeenadii gudiga doorashada & Ciidamadii u heelanaa xaqiijinta Nabadgelyada.
Dowladu waxay go’aan ku gaartay iyadoo u danaynaysa shacabkeeda kana soo baxaysa masuuliyada ka saaran ilaalintooda & Xaq dhowrkooda in si ku meel gaar ah loo hakiyo Geedi socodkii Dimuqraadiyada waxaase guul ah in hanaankaas wax badan laga hirgeliyey Xukuumada dhalan doontaa wixii ka danbeeya 8 Jan, 2014 ay dhaxli doonto meel ay wax ka sii wado.
Rabshadihii Qardho (Eedaynta Cade Muuse).
Madaxweyne Faroole khudbadiisii wuxuu ku eedeeyey rabshadihii ka dhacay Qardho inuu masuuliyadeeda lahaa Madaxweynihii isaga uga horeeyey xafiiska Gen. Maxamuud Muuse Xirsi (Cade) uuna soo abaabulay maleeshiyaadkii soo weeraray Ciidamada Dowlada & Hawlwadeenadii Gudiga doorashada.
Waa wax laga naxo oo aan sinaba looga filayn masuul soo hayey hogaanka Puntland mudo afar (4) sano ah inuu dib ugu gurto Magaaladii uu asal ahaan ka soo jeeday kana huriyo colaad halkii laga sugayey inuu kaalin wax ku ool ah markasta ka ciyaaro Horumarinta, Deganaanshaha & Jiritaanka Dalka.
Warsaxaafadeed uu kaga jawaabay Gen. Cade eeda uga timi Xukuumada wuxuu ku tilmaamay waxba kama jiraan isagoo ku andacooday mudadii uu xilka hayey inuu Dalka gaarsiiyey horumar balaaran dhinacyada Adeega Bulshada, Nabad gelyada & Heshiisiinta beelaha .
4-tii sano ee Hogaanka Puntland ay haysay Xukuumadii Maxamuud Muuse Dalka waxaa soo gaaray dakharo waa weyn oo qaarkood aan weli laga soo kaban sida sicir barar baahsan (bur bur dhaqaale), daabacaada lacago been abuur ah oo ilaa hada ku jira suuqyada, Maamul xumo, Awooda Dowlada oo si khaldan loo adeegsaday, Naas nuujin beelaha qaar oo ilaa hada samri la, Ciidamadii Dowlada oo la kala diray & Caasimadii Gobolka Sool oo barqo cad laga soo huleelay.
Waxaan goob joog ka ahaa xafladii ay xilka kula kala wareegayeen Madaxweynihii wakhtigiisu dhamaaday & Madaxweynaihii cusbaa ee markaas la doortay doorashooyinkii Madaxtooyada 2009 oo ka dhacday hoolka Baarlamaanka Puntland anigoo xasuustaa hadalo uu halkaas ka yiri Gen. Cade.
” Anaga ciidamadii waa naga kala daateen waxaan ka rajeenayaa madaxweynaha cusub (Faroole) & Ku xigeenkiisa (Cabdisemad ) oo aqoon gaar ah u leh Ciidamada inay isu soo ururiyaan ciidamadii oo ka dhigaan kuwo awood leh” Ayuu ku qiray Gen. Cade khudbadiisii.
“Runtii hadii anaga nala dooran lahaa oo tartanka aanu ku guulaysan lahayn wax qorshe ah dalka uma haynin” Ayuu ku sii daray hadalkiisa.
Waxaan ka xumahay in Gen. Cade niyad jebiyo shacabka reer Puntland intooda nabada & horumarka jecel uuna ka farxiyo kuwo ku hawlan hagardaamaynta mustaqbalkeena isagoo ku dhawaaqay inay Puntland burbur qarka u saaran tahay dhawaaqaas oo ah mid aan ka turjumayn masiirka Dalkeena & Xaqiiqada dhabta ah ee jirta.
Dowlada Federaalka.
Waxaa hubaal ah madaxda sare ee Dowladda Federaalku inay ku hawal yihiin sidii ay u majo xaabin lahaayeen maamulka Puntland waxaana sheki ku jirin labada dhinac in uu ku dhaxeeyo dagaal siyaasadeed oo ka furan furimo dhowr ah hadana ku sii baahay meelo aan munaasib ahayn sida in DF xanibto deeqo waxbarasho oo Puntland ka heshay wadanka Suudaan.
Heerka uu taagan yahay Madaxda DF nacaybka Puntland waxaa kuu cadaynaysa sida ay uga gaabsadeen inay ugu soo hambalyeeyaan munaasabadii 1 August halka ay si deg deg ah dhamaantood hambalyo & marxamayn ugu direen Somaliland munaasabadii 18 May oo iyadu dafirsan inay qayb ka tahay Soomaaliya.
Kuma sii dheeraanayo mana ahan wax la soo koobi karo sida Dowladii Soomaaliyeed uga leexatay jidkii saxda ahaa ayna qaaday wadiiqo aan laga filayn horseedi kartana in Umadu sii kala fogaato waxaanse ku boorinayaa umada reer Puntland Madax, Muxaafid, Mucaarad & Shacaba inay u midoobaan sidii looga gaashaaman lahaa weerarada culus ee ina kaga soo furmay Dowladii aynu gurigeena ku dhisnay .
Puntland nin bixiyaa ma geyo.
Iyadoo Puntland maraysa marxalad xasaasi ah oo u baahan in si taxadar & wada jir ah looga gudbo hadana guud ahaan Dalka waxaa ka socda diyaar garow loogu jiro Doorashadii Madaxtooyada oo lagu wado inay qabsoonto 8 Jan, 2014 taas oo muwaadiniin & Siyaasiyiin badan ka mashquulisay inay hoos u eegaan xaaladahaas xasaasiga ah.
Shaqooyinka horyaala Madaxweynaha la dooran doono waxaa ugu muhiimsan sidii uu Madaxda Dowlada Soomaaliya cadaadis ugu saari lahaa inay Dalka ku baahiyaan nidaamka Federaalka, Taageerida Maamulka Juballand, dib u soo celinta qodobadii laga bedelay Dastuurkii saxda ahaa, Sii xoojinta Siyaasada Arrimaha Dibada, U kuur gelida Wada hadalada u dhexeeya DF & Somaliland & Wax ka qabashada Dhaqaalaha.
Shaqooyinkaas & caqabadahaas farah badan waxaa ku guulaysan kara wax ka qabashadooda Siyaasi rug cadaa ah, Go’aan adag leh, Xogogaal ah, Ku xeel dheer siyaasada Arrimaha Dibada, Dhaqaale yahan ah, Xiriir fiicana la leh Beesha Caalamka & Siyaasiyiinta kale ee Soomaali weyn.
Uma malaynayo inuu jiro siyaasi kale oo kaga haboon inuu Dalka hogaamiyo marxaladaas adag Madaxweynaha hada Xafiiska jooga Cabdiraxaan Sh. Maxamed Maxamuud (Faroole) waxaan sidaa u leeyahayna maahan nin jeclaysi ama dano kale laakiin waxaa xaqiiqo ah dhamaan siyaasiyiinta hada xusul duubka ugu jira inay hogaanka qabtaan inaysan gaarsiin karin, waana natiijo kuu soo baxaysa adi shakhsi ahaan hadii aad samayso is bar bar dhig ama musharax kasta gaarkiisa u qiimayso.
Dr. Faroole waa nin xogogaal u ah marxalada maanta Dalku marayo, Waxaa ka go’an in la hirgeliyo nidaamka Federaalku, Waa nin Go’aankiisa aan ka labo labayn, Waa siyaasi rug cadaa ah oo aan hal mar ku soo boodin masraxa siyaasad una soo maray jaran jaro dheer min Agaasime Bank, Gudoomiye Gobol ilaa heer Wasiir, Wuxuu ka dheregsan yahay sidii loo musuq maasuqay Dastuurkii saxda ahaa, Waa Diblumaasi ku xeel dheer Siyaasada Arrimaha Dibada fagaarayaasha caalamkana ka sheegan kara wixii tabashadiisa ah, Wuxuu Xiriir adag la dhistay mudadii uu xafiiska joogay Wadamada deriska & kuwa beesha caalamka, dhamaan sababahaasi waa kuwa ii cadeeyey in uusan muuqan ilaa & hada siyaasi kaga haboon hogaaminta Dalka.
Waxaan ku kalsoonahay inuu ku guulaysan doono Dagaalka siyaasadeed ee ka dhexeeya Dowlada Federaalka & Puntland hadii dib loo soo doorto sidii uu ugu guulaystay dagaalkii siyaasadeed ee u dhexeeyey Xukuumadiisii & Dowladii Midnimo Qaran ee uu hogaanka u hayey Madaxweyne Shiriif Sh. Axmed.
Waxaan aaminsanahy in fursad loo siiyo sidii uu uga miro dhalin lahaa dadaalada uu ugu jiro sidii Dalka looga hirgelin lahaa Nidaamka Asxaabta badan, Horumarinta & hagaajinta kaabayaasha dhaqaalaha, Saray u qaadida Adeegyada bulshada, Maamul wanaag, Maamul baahinta, Dhisida Hay’ado Dowladeed oo awood u leh inay ka jawaabaan adeegyada bulshadu uga baahan tahay & Sii adkaynta xiriirka Puntland la wadaagto Aduunyada inteeda kale.
Gebo gebadii.
Soomaalidu waa dad is bedelka jecel qofkana aan ku qiimayn waxay ku arkaan waxaan xasuustaa maalintii la dooranayey Madaxweynaha Soomaaliya dhamaan umada Soomaaliyeed meel kasta ay joogto waxay taageersanaayeen in is bedel dhaco oo Madaxweynihii markaas xilka hayey Shiriif Axmed la bedelo .
Markii Doorashadii uu ku guulaystay Madaxweyne Xasan Sh. waxaa lagu soo dhoweeyey mashxarad, Amaan & Dabaal deg, la isma weydiin waa kuma Xasan? ma yahay nin ku haboon inuu Dalka ka saaro marxalada uu ku jiro? Muxuu khibrad leeyahay? qofkii aad adigu weydiiso su’aalahaas kuma siin karayn jawaab aan ka ahayn waa Professor! Waa nin mudadii burburka Dalka ku sugnaa! Machad buu Muqdisho ka furay! Dhamaan astaamahaasi ma xuma laakiin ma ahayn kuwo lagu xulan karo Madaxweyne la doonayo inuu majaraha u qabto Dal 20 sano in ka badan ku soo jiray bur bur & dagaalo sukeeye.
Mudo kooban gudaheed 90% Dadkii Soomaaliyeed ee taageerayey guusha Madaxweyne Xasan waxay naftooda ula jeensadeen canaan & hiif iyagoo intooda badan isku raacay in loo darsaday Madaxweynihii la bedelay Shiikh Shiriif Sh. Axmed.
Ugu Danbayntii Guud ahaan Shacabka reer Puntland Gudo & Dibad, Muxaafid & Mucaarad, Caruur & Ciroole, Rag & Haween, Seef la bood & qunyar socod waxaan ugu baaqayaa in ay ka fiirsadaan cida ay ku aamini doonaan masiirkooda shanta sano ee soo socota balse sidii doorashadii Soomaaliya aysan ina qaadan dabayl is bedel doon oo dhinac ay ka soo dhacayso & dhinac ay u dhacayso aynan kala saari karin.
Shiine Culay
Qoraa, Saxafi madax banaan & Falanqeeye Idman Raxanreeb
Facebook: Prince Shiine Culay | Tiwtter: @Shiinculay | Email: Shiine.culay@gmail.com
============
QORAAGA AYEY U GAAR TAHAY QORAALKAAN LOOMAMA FASIRAN KARO TAN RAXANREEB.COM CIDII RABTA IN AY SI GAAR AH MAQAAL AMA FIKRAD U SOO DIRTO RAXANREEB WAXAA LOOGU SOO HAGAAJIN KARTAA ADMIN@RAXANREEB.COM
Use Facebook to Comment on this Post
