Garoowe (RBC) War saxaafadeed galabta [12/05/2013] ka soo baxay xafiiska madaxtooyada Puntland ayaa lagu sheegay in koox xildhibaano ah oo ka tirsan baarlamaanka federaalka Soomaaliya ay wadaan olole ka dhan ah raysul wasaare Cabdi Faarax Shirdoon Saacid.
Sida lagu sheegay war saxaafadeedka xafiiska madaxtooyada Puntland ka soo baxay, waxaa ololahan looga gol leeyahay in lagu abuuro isqabqabsi siyaasadeed oo ka dhex bilawda hay’adaha dawlada federaalka Soomaaliya.
“Puntland waxay si adag uga digeysaa soo cusbooneysiinta khilaafka siyaasadeed ee ka djex jiray hay’adaha dawlada federaalka Soomaaliya, iyadoo ay jiraan koox xildhibaano ah oo wada olole [mooshin] ay uga soo horjeedaan raysul wasaare Saacid oo kaliya mudo 7 bilood ah xafiiska ku sugnaa.” ayaa lagu yiri war saxaafadeedka.
“Iskudaygaasi waa mid luminaya waqti, dhaqaale iyo dedaalka wadajirka ah ee ay Soomaalida talada ka go’do iyo saaxiibada caalamka ay ku bixiyeen keenista nidaamka federaalka.” ayaa lagu yiri war saxaafadeedka.
War saxaafadeedka Puntland ayaa ku soo beegmay xilli qaar ka mid ah beelaha Soomaalida ay ku gadoodeen magacaabista saraakiisha cusub ee hogaanka booliska iyo nabadsugida dalka.
RBC Radio
Use Facebook to Comment on this Post
