Baay(RBC Radio) Wararka ka imaanaya deegaanka Goof-guduud ee gobolka Baay ayaa ku waramaya in maanta barqadii uu askari ka tirsan ciidanka dowladda Soomaaliya uu rasaas khasaaro dhalisay ku furay dad rayid ahaa oo ku sugnaa afaafka hore ee xarunta maamulka deegaankaas.
Goobjooge ku sugan deegaanka Goof-guduud ayaa warbaahinta uga waramay sida ay wax u dheceen,wuxuuna sheegay inuu muran dhexmaray askari Waardiye ka ahaa xarunta maamulka Goof-guduud iyo dad doonayey iney la kulmaan masuulka madaxda ka ah maamulka deegaanka.
Askariga ayaa weydiiyey dadkii goobta ku sugaan waxa ay halkaa u joogaan,waxayna u sheegeen iney sugayaan masuulka deegaanka oo xiligaa ku jiray gudaha xarunta maamulka,askariga ayaa dadkii ku amray iney goobta ka dhaqaaqaan,balse waxaa ay ku adkeysteen ineysan meesha ka tagayn ilaa ay la kulmaan masuuliyiinta maamulka oo uu ujeedkoodu ahaa iney la kulmaan.
Askariga ayaa intaa kadib rasaas oodda kaga qaaday dadkii shacabka ahaa,waxaana goobta ku geeriyooday hal ruux halka mid kalane uu ku dhaawacmay kaasoo dhaawiciisa loola cararay Isbitaalada magaalada Baydhabo,gacan ku dhiiglihii tacshiiradda furay ayaa la tilmaamayaa iney gacanta ku hayaan ciidamada dowladda Soomaaliya, masuuliyiinta maamulka gobolka Baay ayaa la tilmaamay iney goobta gaareen si ay u qaboojiyaan xiisad ka dhalatay dilka iyo dhaawaca dadkaas loo geystay.
Ehelada ruuxa geeriyooday ayaa diiday in la duugo Marxuumka ilaa tiirka la geeyo gacan ku dhiiglihii dilay,masuuliyiinta maamulka gobolka ayaa ballan qaaday in la toogan doono askariga dilka geystay,waxayna ku qanciyeen Qoyska marxuumka geeriyooday in marka hore la Aaso Meydka Marxuumka.
Use Facebook to Comment on this Post
